Nú standa yfir framkvæmdir á Gufunesvellinum en í þessum áfanga er verið að ganga betur frá körfunum en áður hefur verið. Þannig verða þær steyptar niður og stilltar af í réttri hæð og halla. Stefnt er að því að völlurinn opni aftur í lok næstu viku.
Fimmtudaginn 7. júní var haldið mót á vellinum á Úlfljótsvatni. Spilaðir voru tveir hringir í flottu veðri við bestu aðstæður. Haukur Árnason vann mótið, Birgir Ómarsson lenti í öðru sæti og Árni Leósson í því þriðja.
Fyrsta mánaðarmótið var haldið þann 17. maí mættu 18 keppendur til leiks. Keppt var í fjórum flokkum í fyrirtaksveðri. Fyrstu mánaðarmeistarar sumarsins eru Þorvaldur Þórarinsson í karlaflokki og Kristrún Gústafsdóttir í kvennaflokki.
Sigurvegari í barnaflokki varð Júlían Máni Kristinsson en hann sigraði Sævar Breka í bráðabana. Sigurvegari í byrjendaflokki varð Sigmar.
Nánari úrslit finnur þú á hér.
Nú er allt að fara í gang á folfvöllum landsins enda veðrið að batna með hverri vikunni. Næsta fimmtudag verður fyrsta “mánaðarmótið” í sumar en það verður haldið þriðja fimmtudag í hverjum mánuði fram á haust. Mótið fer fram á vellinum á Klambratúni og hefst kl. 19. Keppt verður í opnum flokki, kvennaflokki, byrjendaflokki og barnaflokki. Keppnisgjald er 1.000 kr. fyrir félaga ÍFS (2.000 fyrir aðra). Við hverjum alla til að mæta og hafa gaman að.
Sunnudaginn 6. maí verður Haukur Árnason með kynningu á folfi og heldur um leið mót á Klambratúni en slíkur viðburður fer fram víða um heim þennan dag undir nafninu “World Biggest Discgolf Weekend” hvorki meira né minna. Allar nánari upplýsingar eru á Facebook síðunni okkar en kynningin hefst kl. 14. Við hvetjum alla til að mæta með vini eða ættingja sem langar að kynnast þessu skemmtilega sporti.
Frisbígolfsambandið er búið að kynna mótaskrá sumarsins en upplýsingar má finna undir flokknum “keppnir”. Við endurvekjum hin vinsælu mánaðarmót en þau eru haldin þriðja fimmtudag í hverjum mánuði frá maí fram í september. Við hvetjum alla til að taka þátt í þessum mótum enda skemmtilegt að reyna hæfni sína á móti öðrum spilurum. Á hverju móti er keppt í nokkrum flokkum ef næg þátttaka fæst.
Eftir langan og erfiðan snjóvetur er kominn tími til að taka út folfdiskana og byrja að kasta. Undanfarið hafa spilarar verið að mæta á vellina og má nú sjá spilara daglega á Klambratúni enda veður að verða mjög hagstætt. Sjáumst.
Nú er daginn farinn að lengja og styttist í að við kveðjum snjóinn. Vellirnir koma vel undan vetri og við hlökkum mikið til komandi sumars. Nýjir diskar hafa verið kynntir frá Discraft og Innova sem eiga að vera enn betri og langdrægari og eru þeir þegar komnir í sölu hér heima. Sjáumst fljótlega á vellinum.
Hið árlega Áramót var haldið í dag í góðu veðri og mættu 11 vaskir keppendur til leiks. Mikill snjór er í Gufunesi sem reyndist mörgum erfitt yfirferðar og fór svo að 4 keppendur luku leik. Mjög skemmtilegt er að spila völlinn í svona miklum snjó enda voru mörg skot í skrautlegri kantinum. Þrátt fyrir þetta vann Þorri á frábæru skori eða 6 undir (48 skotum), Birgir varð í öðru sæti, Haukur í þriðja og Jón Símon í fjórða. Í ljós kom að bleikir diskar sjást best í svona aðstæðum.
Nú er snjórinn loksins kominn og frostið farið að bíta. Mjög skemmtilegt er að spila frisbígolf á veturna þó að diskarnir breyti aðeins um hegðun. Gott ráð er að skilja alla hvíta diska eftir heima en nota frekar skæra liti sem auðvelt er að finna.
Svo er auðvitað nauðsynlegt að vera vel klæddur með húfu og vettlinga. Góða skemmtun!