Mótaröð fyrir byrjendur í keppnisfolfi!
Silfurmótaröð Íslandsbikarsins eru fimm frisbígolfmót sem eru haldin frá maí til ágúst. Mótin verða áfram einn til tveir dagar með tveimur hringjum. Lágmark 9 brautir í einum hring og hámark 36 brautir í tveimur hringjum. Mótaröðin er skipulögð af Íslenska frisbígolfsambandinu. Þessi mót eru bæði ætluð þeim sem eru að stíga sín fyrstu skref í keppni og þeim sem eru að afla sér reynslu og þróa færni í frisbígolfi. Mótin gefa PDGA stig fyrir þá sem eru skráðir í PDGA en það þarf ekki að vera með PDGA skráningu til að taka þátt.

Veitt eru verðlaun fyrir 3 efstu sætin í öllum flokkum á hverju móti og eru þau verðlaun afhent í lok móts enda hvert mót sjálfstætt. Hvert sæti gefur stig til Íslandsbikarsins og verður stigalisti uppfærður eftir hvert mót. Þrjú bestu mótin gilda samkvæmt meðfylgjandi stigatöflu (hér fyrir neðan).

Keppendur í Silfurmótaröðinni geta fyrsta árið sitt í keppni, keppt bæði í Gull- og Silfurmótaröðinni til að átta sig á hvaða mótaröð hentar best fyrir þá. Aðrir keppendur velja að keppa annað hvort í Gull- eða Silfurmótaröð eftir getustigi.

Heimilt er að skipta um flokk á milli móta en keppandi tekur ekki áunnin stig með sér á milli flokka eða mótaraða og getur aðeins unnið einn flokk (þann sem telst sterkari).

Að síðasta Silfurmótinu loknu verður veittur Íslandsbikar í hverjum flokki. Um er að ræða farandbikar sem sigurvegarar varðveita í eitt ár eða þar til næstu mótaröð lýkur. Hver keppandi getur aðeins unnið Íslandsbikar í einum flokki og þarf að taka þátt í lágmark tveimur mótum til að fá bikar. Sé keppandi stigahæstur í fleiri en einum flokki telst hann sigurvegari sterkasta flokksins.

Mótin sem eru hluti af Íslandsbikarnum 2026 eru:

Íslandsbikarinn Silfurmót 1 31. maí – ÍFS Vífilsstaðir og Guðmundarlundur

Íslandsbikarinn Silfurmót 2 6.-7. júní  – FGA Hamrar Akureyri

Íslandsbikarinn Silfurmót 3  14. júní  – FGÁ Selfoss

Íslandsbikarinn Silfurmót 4 26. júlí – ÍFS Hvanneyri

Íslandsbikarinn Silfurmót 5  23. ágúst – ÍFS Grafarholt

Íslandsmótið 2026 verður ekki hluti af Íslandsbikurum. Þeir sem eru með háa reitingu í PDGA stigum og góða færni geta skráð sig á Íslandsmótið svo við hvetjum þá sem hafa áhuga á þátttöku að skrá sig í PDGA, safna stigum á mótum í sumar og reyna fyrir sér með bestu spilurum landsins í byrjun ágúst.

12 keppnisflokkar eru í boði á Silfurmótaröðinni 2026:
Almennur flokkur 2 –  MA2

Almennur flokkur kvenna 2 – FA2
Almennur flokkur 3 – MA3
Almennur flokkur kvenna 3 – FA3
Almennur flokkur 40 ára og eldri – MA40 
Almennur flokkur kvenna 40 ára og eldri – FA40 
Almennur flokkur 50 ára og eldri – MA50
Almennur flokkur kvenna 50 ára og eldri – FA50
Ungmennaflokkur 15 ára og yngri – MJ15
Ungmennaflokkur kvenna 15 ára og yngri – FJ15
Barnaflokkur 12 ára og yngri –  MJ12
Barnaflokkur kvenna 12 ára og yngri – FJ12

Í aldursflokkum er miðað við fæðingarár. Til dæmis eru þeir sem verða 40 ára árið 2026 yngstir í MA40 og þeir sem verða 12 ára árið 2026 elstir í MJ12. 

Mótsstjóri upplýsir keppendur um hvaða teigar eru spilaðir fyrir mót.

Áhugasamir um að keppa geta fengið upplýsingar og aðstoð við skráningu á motanefnd@folf.is eða skráð sig til keppni í gegnum Udisc forritið.  Mikilvægt er að skrá sig áður en skráningarfrestur rennur út til að auðvelda mótsstjórum að kaupa verðlaun og raða í ráshópa. Einnig er mikilvægt að láta vita eins fljótt og hægt er ef að viðkomandi kemst ekki á mótið til að tefja ekki að mótið geti byrjað á réttum tíma.

Stigagjöf
Stigagjöf ÍFS fyrir Íslandsbikarinn er aðlagað að íslenskum keppnisfjölda og byggt á útreikningum frá þremur PDGA stigakerfum frá stórmótum erlendis. Þrjú bestu mótin gilda og vinna keppendur sér inn stig í þeim flokkum sem þeir keppa í. Skipti keppendur um flokk fylgja stigin ekki með. Ef keppendur enda jafnir fara stigin í efstu þrem sætunum eftir niðurstöðu úr bráðabana hverju sinni. Sæti 4 – 19+ fá stigin óbreytt í því sæti sem keppendur lenda í, óháð hversu margir eru jafnir.

1. sæti                         100 stig
2. sæti                         90 stig
3. sæti                         81 stig
4. sæti                         72 stig
5. sæti                         64 stig
6. sæti                         56 stig
7. sæti                         49 stig
8. sæti                         42 stig
9. sæti                         36 stig
10. sæti                       30 stig
11. sæti                       25 stig
12. sæti                       20 stig
13. sæti                       16 stig
14. sæti                       12 stig
15. sæti                       9 stig
16. sæti                       6 stig
17. sæti                       4 stig
18. sæti                       2 stig
19. sæti eða neðar      1 stig

Jafntefli hjá keppendum í heildarniðurstöðu.
Ef spilarar eru enn jafnir að stigum þá eru skoðaðar innbyrðis viðureignir þessara spilara á mótaröðinni.

Ef spilarar eru jafnir að stigum eftir það eru talin saman heildarstig í allri mótaröðinni og sá spilari sem er með fleiri stig vinnur.

Ef enn er jafnt þá skal hlutkesti ráða.

Nánara fyrirkomulag

• Hægt er að fella niður eða færa umferð á móti ef veðuraðstæður eru óviðráðanlegar. Þá er miðað við a.m.k. veðurviðvörun frá Veðurstofunni. Mótsstjóri tekur lokaákvörðun um það.
• Skráning fer fram í áföngum þar sem allir flokkar eru í boði í lágmark viku og hámark þangað til viku fyrir mót þá eru flokkar sem enginn er skráður í teknir úr umferð.

                                                                                    Birt með fyrirvara um breytingar.