Helgina 7.-9. september fór fram Íslandsmótið í frisbígolfi en þetta er í 14. skiptið sem mótið er haldið. Þetta ár var boðið upp á 8 keppnisflokka og keppt um Íslandsmeistaratitil í 5 þeirra. Mótið heppnaðist mjög vel enda lék veðrið við okkur alla helgina. Keppt var á þremur völlum, Gufunesi, Grafarholti og Vífilsstöðum og var því mikil fjölbreyttni fyrir spilara. Æsispennandi keppni var í opnum meistaraflokki og réðust úrslit ekki fyrr en í síðasta kastinu þegar Mikael Máni Freysson setti niður sitt síðasta pútt en aðeins einu kasti munaði á honum og Blæ Erni Ásgeirssyni sem varð í öðru sæti.

Meistaraflokkur: Mikael Máni Freysson
Meistaraflokkur kvenna: Kolbrún Mist Pálsdóttir
Stórmeistaraflokkur 40+: Haukur Arnar Árnason
Ungmennaflokkur 18 ára og yngri: Andri Fannar Torfason
Barnaflokkur 12 ára og yngri: Kormákur Flóki Klose

Við óskum öllum vinningshöfum til hamingju, nánari úrslit má finna hér:

Næstu helgi verður Íslandsmótið í frisbígolfi haldið en þetta verður eitt glæsilegasta Íslandsmótið til þessa. Fimm Íslandsmeistarar verða krýndir en spilað verður á 3 völlum á laugardag og sunnudag. Mikil spenna er um úrslitin enda margir sem geta blandað sér í toppbaráttuna. Skráningu lýkur á fimmtudaginn og við hvetjum alla áhugasama til að taka þátt með því að senda skráningu á folf@folf.is.
Á föstudeginum verður haldið Íslandsmótið í Texas Scramble en þá keppa tveir í liði og betra kastið gildir. Allir geta tekið þátt í þessu móti en við bjóðum í fyrsta sinn upp á paraflokk þar sem kona og karl geta skráð sig saman í liði.

Það hefur verið gaman að sjá lífið sem nú er á öllum frisbígolfvöllum landsins en aðsóknin hefur aldrei verið meiri enda má segja að nú sé besti tími ársins til að spila folf. Í sumar bætast 12 nýjir vellir við þá sem fyrir eru og er óhætt að segja að nýju vellirnir hafi fengið góðar viðtökur. Auk þess var völlurinn í Grafarholti endurbættur með nýjum teigum á öllum brautum og völlurinn á Hömrum Akureyri var stækkaður í 18 brautir.
Við hvetjum alla til þess að nota tækifærið, drífa sig út á völl með diskana og taka vini eða ættingja með. Það verða allir að fá að prófa frisbígolf.

Nú í júlí stigum við stórt skref í sögu frisbígolfsins á Íslandi þegar Íslenska frisbígolfsambandið (ÍFS) útskrifaði 15 frisbígolfkennara en þeir sóttu allir alþjóðlegt námskeið í byrjun maí sem haldið var hér á landi.
Þessir aðilar eru nú viðurkenndir ÍFS frisbígolfkennarar og geta því tekið að sér námskeið og kennslu bæði fyrir einstaklinga og hópa. Við vonum að þetta auki áhuga og gæði á íþróttinni og hjálpi spilurum að verða enn betri í þessari frábæru íþrótt.

Þeir sem hafa áhuga á kennslu geta sent skilaboð hér á FB síðunni eða á netfangið folf@folf.is

Nú þegar fjöldi frisbígolfvalla hér á landi hefur aldrei verið meiri (rúmlega 50) fáum við margar fyrirspurnir um hvar hægt sé að finna yfirlit yfir þá alla. Á þessari vefsíðu er ítarlegt yfirlit yfir alla vellina. Annarsvegar undir flipanum “Vellir” þar sem allir vellir eru í stafrófsröð með mynd og korti af hverjum velli og hinsvegar á forsíðunni þar sem búið er að setja þá undir Google Maps kort sem hægt er að smella á.

Nú í sumar hefur orðið mikil aukning í barna- og unglingastarfi í frisbígolfinu en í fyrsta sinn erum við að bjóða upp á sérstök námskeið fyrir þessa aldurshópa. Þannig hafa fjölmargir krakkar fengið tækifæri í sumar á að læra réttu handtökin af sérmenntuðum frisbígolfkennurum og öruggt að við munum sjá meira til þeirra í framtíðinni.
Hér er hress hópur Þróttara sem var á námskeiði í vikunni og okkur sýnist áhuginn skína úr hverju andliti.

Síðustu daga nutum við íslendingar þess heiðurs að fá sjálfan heimsmeistara kvenna, Paige Pierce í heimsókn til okkar en hún hélt námskeið bæði í Reykjavík og á Akureyri fyrir námsfúsa folfara. Óhætt er að segja að Paige hafi vakið athygli í frisbígolfheiminum undanfarin ár en hún hefur núna unnið heimsmeistaratitilinn fjögur ár í röð og er nánast ósigrandi á þeim mótum sem hún keppir á. Þrátt fyrir að vera aðeins 27 ára hefur hún spilað frisbígolf í um 20 ár enda kynnti faðir hennar sportið fyrir henni strax á unga aldri.

Það sem vekur auðvitað sérstaka athygli við Paige er hversu tæknilega góð hún er þrátt fyrir að vera hvorki hávaxin eða kraftaleg og sýnir svo greinilega að tæknin er það sem skiptir mestu máli í frisbígolfinu en ekki vöðvakraftur eða líkamlegir yfirburðir. Paige heillaðist af landi og þjóð og stefnir á að koma hingað aftur sem fyrst.

Á þessu sumri bætast 12 nýir frisbígolfvellir við þá sem fyrir eru en sífellt fleiri sveitarfélög eru að uppgvöta hversu frábært frisbígolf er fyrir íbúa sína enda eitt skemmtilegasta og ódýrasta lýðheilsuverkefni sem hægt er að finna.
Þessir nýju vellir eru: Guðmundarlundur í Kópavogi (byrjun júlí), Grímsey (byrjun júlí), Árnes (tilbúinn), Fáskrúðsfjörður (tilbúinn), Sauðárkrókur (byrjun júlí), Eiðar (BSRB), Vogar (byrjun júlí), Grindavík (4 körfur), Svalbarðseyri (miðjan júlí), Þorlákshöfn (byrjun júlí), Eyrarbakki (byrjun júlí) og Garðabær (júlí). Í sumar verða því 57 frisbígolfvellir komnir upp hér á landi en auðvitað er frítt að spila á þeim öllum. Við hvetjum folfara til að taka frisbídiskana með sér í sumarfríið og prófa sem flesta velli.

Til viðbótar við þetta er verið að stækka völlinn á Hömrum Akureyri í 18 brautir en hann verður tilbúinn um miðjan júlí. Fram að þessu hefur völlurinn í Gufunesi verið eini 18 brauta völlur landsins og er mikil tilhlökkun folfara að fá annan stóran völl. Opnunarmótið á þeim velli verður helgina 20.-22. júlí en sérstakur afsláttur er fyrir folfara á tjaldsvæðinu á Hömrum þá helgi. Einnig standa yfir framkvæmdir við völlinn í Grafarholti en þar er verið að setja flotta gervigrasteiga á allar brautir auk þess að brautum 7 og 8 er breytt töluvert. Grafarholtsvöllurinn verður eftir þessar breytingar sá flottasti í landinu en minna má á að þar er opið hús alla sunnudaga frá kl. 13-15 þar sem hægt er að fá lánaða diska auk kennslu í sportinu.

Nú í júní erum við svo heppin að heimsmeistari kvenna, bandaríkjamaðurinn Paige Pierce, kemur hingað til landsins og heldur námskeið fyrir þá sem vilja læra betur rétt handtök í frisbígolfi. Paige er ríkjandi heimsmeistari og hefur unnið titilinn alls fjórum sinnum þrátt fyrir ungan aldur auk þess að vera stigahæsta konan í sögu sportsins.
Boðið verður upp á ólík námskeið, bæði fyrir byrjendur en einnig lengra komna auk þess að haldið verður sérstakt kvennanámskeið en það er sérstaklega miðað við þær sem styttra eru komnar.
Við hvetjum alla folfara til þess að nýta sér þetta frábæra tækifæri en námskeiðin fara fram 20., 21. og 23. júni og verða bæði í Reykjavík og á Akureyri. Nánari upplýsingar er hægt að finna á www.fuzz.is