Nú er komið að næsta mánaðarmóti en það er haldið fimmtudaginn 17. júlí og hefst kl. 19 (mæting 18.30) á Gufunesvelli. Keppt í öllum flokkum A, B, C, kvenna- og barnaflokki.

Keppnisgjald er 1.000 kr. fyrir félagsmenn ÍFS, 2.000 kr. fyrir aðra.

Nú liggur fyrir dagskráin á heimsókn þessara tveggja snillinga til landsins. Við hvetjum auðvitað alla áhugasama að nýta þetta einstaka tækifæri og læra handtökin af þeim bestu í heimi. Þeir kenna bæði pútttækni og löng köst. Þeir eru báðir þekktir fyrir að vera frábærir púttarar auk þess að vera með þeim lengstu í langskotum.

Við ætlum að fá þá til þess að spila tvo sýningarhringi í Gufunesi þar sem þeir sýna okkur hvernig þeir gera þetta, útskýra köstin og val á diskum. Það eru allir velkomnir að mæta á það og kostar ekkert.

Félagarnir Avery og Simon halda þrjú námskeið og verð á hverju námskeiði er aðeins 3.500 kr fyrir félagsmenn ÍFS, 5.000 kr. fyrir aðra.

22. júlí (þriðjudagur) – kl. 20.30 Hittingur á Klambratúni
23. júlí (miðvikudagur) – kl. 16-18 Námskeið (pútt)
23. júlí (miðvikudagur) – kl. 20-22 Námskeið (drive)
24. júlí (fimmtudagur) – kl. 19-21 Námskeið (drive)
25. júlí (föstudagur) – kl. 19.00 Sýningarhringur í Gufunesi

Í lok júlí koma til landsins tveir af þekktustu folfurum í heimi, þeir Avery Jenkins og Simon Lizotte, í boði Íslenska frisbígolfsambandsins. Þeir munu halda hér námskeið undir heitinu “Deep in the game” en þeir hafa ferðast víða með þessi vinsælu námskeið. ÍFS hefur lengi reynt að fá þá til Íslands og við erum mjög ánægðir með að það skildi loksins hafa tekist. Nákvæm dagsetning og fyrirkomulag námskeiðanna liggur ekki enn fyrir en líklega verður þetta á tímabilinu 22.-26. júlí nk. Þeir munu ekki keppa hér á landi en við munum líklega fá þá til að taka hring í Gufunesi og sjá þá hvernig atvinnumenn gera þetta.

Avery Jenkins vann heimsmeistaratitilinn 2009 og hefur verið einn öflugasti folfari heims síðan. Hann er fæddur í Bandaríkjunum 1978 og er búinn að vera atvinnumaður í frisbígolfi síðan 2002 og hefur m.a. þrisvar orðið bandarískur meistari í lengdarkeppni en lengsta kastið hans er 212 metrar. Undanfarið hefur hann einbeitt sér að þjálfun og kennslu en hann er einmitt þjálfari Simon Lizotte.

Simon Lizotte er 22 ára gamall þjóðverji sem er þessa stundina einn af bestu frisbígolfspilurum heims. Þrátt fyrir ungan aldur er hann núverandi Evrópumeistari og margfaldur Þýskalandsmeistari. Hann er bæði frábær púttari en einnig er hann með lengstu kösturum í dag og á m.a. hraðametið þegar hann kastaði diski á 144 km hraða. Margir spá honum heimsmeistaratitlinum á næstu árum.

Við setjum inn nánari upplýsingar og skráningu fljótlega.

Með aukinni vitund um mikilvægi lýðheilsu hefur orðið vakning á fjölbreyttri og ódýrri afþreyingu og hollri hreyfingu. Þannig hefur orðið mikil aukning síðustu ár á þeim sem hafa uppgvötað frisbígolf og eru farnir að stunda það af kappi. Þessu hafa mörg sveitarfélög tekið eftir og fáum við fjölda fyrirspurna þar sem verið er að velta því upp af hverju ætti að setja upp frisbígolfvöll í bæjarfélaginu. Nú eru komnir 30 vellir hér á landi og ekki ólíklegt að þeim fjölgi enn frekar á næstu 2-3 árum.

Ástæðurnar eru fjölmargar. Fyrir utan tilbreytingu og fjölbreytni í afþreyingu þá er frisbígolfið sérlega hentugt fyrir alla aldurshópa og auðvelt fyrir hvern sem er að ná tökum á því.

• Ódýrt og einfalt er að setja upp heilan völl. Engar landslagsbreytingar.
• Kostar ekkert að spila á völlunum.
• Búnaður er mjög ódýr, í byrjun nægir einn 2.000 króna frisbídiskur.
• Hentar allt frá börnum til ömmu og afa.
• Hægt að spila í flestum veðrum, allt árið.
• Holl og góð hreyfing.
• Hægt að stunda einn eða fara með vinahópnum.
• Færir nýtt líf á svæði þar sem er t.d. skógrækt, útivistarsvæði, almenningsgarðar ofl.
• Viðhald á völlunum er mjög lítið.

Það er því engin spurning að frisbígolfvöllur er frábær viðbót við þá afþreyingu sem fyrir er. Hafið endilega samband við okkur á folf@folf.is til að fá ráðleggingar eða svör við spurningum.

Það er orðinn árlegur viðburður að nota birtuna í júní og halda miðnæturmót. Eitt slíkt var haldið 19. júní sl. og mættu tæplega 40 keppendur þrátt fyrir rigningu. Keppt var í fjórum flokkum; A, B, C og kvennaflokki og heppnaðist mótið mjög vel.

Niðurstöður og skor má sjá hér.

Nú er völlurinn í Hrísey tilbúinn til spilunar og eins og sjá má á kortinu hér að ofan er þetta 9 brauta völlur með tveimur teigum á hverri braut. Við hvetjum auðvitað alla folfara til þess að koma við í Hrísey og spila þennan nýjasta völl okkar sem mun vera mjög skemmtilegur með lengstu braut upp á 94 metra. Byrjunarteigur er við gamla skólann.

Nú er sumarveðrið skollið á og allir folfvellir orðnir fullir af áhugasömum spilurum. Margir orðnir spenntir eftir langan vetur. Nýju vellirnir eru allir í vinnslu, sumir komnir í gagnið (Hrísey og Mosfellsbær) en aðrir í undirbúningi. Við reiknum með því að þeir verði allir klárir í júlí. Völlurinn á Akranesi verður einnig stækkaður upp í 9 brautir en Garðalundur er frábær staður fyrir folf.

Völlurinn í Gufunesi verður tekinn í gegn í sumar. Bæði verður vellinum breytt mikið en eins verður öllum gömlu körfunum skipt út fyrir nýjar. Settir verða þrír teigar á hverja braut (rauðir-hvítir-bláir) og lagað verður undirlagið á þeim öllum. Settar verða fleiri merkingar þannig að nýjir spilarar eigi betur með að rata um völlinn. Starfsmenn Gufunesbæjar ætla að sjá um sláttinn í sumar enda veitir ekki af.

Nú er völlurinn i Mosfellsbæ tilbúinn og öllum opinn til notkunar. Völlurinn er í svokölluðum Ævintýragarði sem er svæði sem búið er að hanna sem framtíðar útivistar- og skemmtisvæði. Auðvelt er að komast á hann með því að leggja bílnum við gömlu sundlaugina/íþróttahúsið og fylgja göngustíg á völlinn. Tveir teigar eru á vellinum, rauðir sem eru auðveldari og tilvaldir fyrir byrjendur og hvítir sem eru erfiðari og hentugir fyrir vanari spilara. Hægt er að sækja vallarkort hér á síðunni undir flokknum “vellir”.

Nú liggur fyrir staðfest að það koma amk. 10 nýir vellir í sumar og í lok sumars verða þeir því orðnir 17 talsins. Hér er kort með staðsetningu valla til þess að menn geti skipulagt sumarfríin sín betur með fjölskyldunni í sumar!

Mismunandi er hvenær vellirnir verða spilahæfir og margt sem getur haft þar áhrif á. Okkar von er að þeir verði flestir tilbúnir um miðjan júlí.

Maí mánaðarmótið verður haldið fimmtudaginn 22. maí á Gufunesvellinum og hefst mótið kl. 19. Keppt verður í öllum flokkum og skráning hefst á vefnum föstudaginn 16. maí. Við hvetjum alla til þess að taka þátt.