Árið 2016 hefur verið frábært fyrir frisbígolfið og ánægjulegt að sjá hversu mörg ný andlit sáust á völlunum um allt land. Þrír nýjir vellir voru opnaðir og vinsælustu vellirnir voru troðfullir flesta góðviðrisdaga í sumar. Þannig var oftast biðröð á fyrsta teig á Klambratúni sem er okkar vinsælasti völlur. Aldrei hafa fleiri mót og keppnir verið haldin en á þessu ári en þau yrði yfir 60 sem er mikil fjölgun frá því í fyrra. Um síðustu helgi lauk haustmótaröðinni 999 þar sem spilað var á þeim 9 völlum sem nú eru komnir á Stór-Reykjavíkursvæðinu.

Við lítum bjartsýnum augum á næsta ár en nú þegar er staðfest að margir nýjir vellir verða settir upp og sá fyrsti af þeim mun koma í vetur í Kópavogsdalnum. Nokkur mót verða einnig í vetur en það fyrsta er hið árlega Áramót sem ávallt er haldið í Gufunesi, fyrsta sunnudag ársins kl. 13. Svo skemmtilega vill til að sá dagur er núna 1. janúar. Fyrstu helgina í júlí verður haldið hér alþjóðlegt mót á Gufunesvelli þar sem okkar bestu menn munu spreyta sig á móti erlendum keppendum.

Sífellt fleiri eru farnir að selja diska og búnað fyrir sportið en sá nýjasti er Intersport sem þegar er farinn að auglýsa í dagblöðum. Það hefur því aldrei verið auðveldara að kaupa folfdiska og mjög skemmtilegir tímar framundan.

PDGA (Professional Disc Golf Association) gefur reglulega út lista yfir stöðu skráðra félaga sem sýnir getu þeirra á viðurkenndum mótum. Þetta kallast “rating” og því hærri sem hún er því betri eru spilararnir. Sem dæmi þá er efsti maður á heimslistanum í dag Richard Wysocki með rating 1048 en efsta konan er Catrina Allen með rating 966. Til samanburðar er efsti íslendingurinn Ástvaldur Einar Jónsson með 964 í rating.

Nú á dögunum tóku þeir saman hvaða karl og kona eru bestu spilarar síðustu 10 ára samkvæmt “ratings” og kom þá í ljós að David Feldberg og Valerie Jenkins eru á toppnum á þeim lista.

Þrátt fyrir að frisbígolfið sé enn vinsælast í Bandaríkjunum þá er gaman að sjá vöxtinn á sportinu á heimsvísu þ.e. utan Bandaríkjanna. Núna eru um 5.500 vellir á heimsvísu, þarf af 1113 utan Bandaríkjanna.

Árið 1986 voru átta vellir á Norðurlöndunum og árið 1990 voru samtals 32 vellir utan Bandaríkjanna. Þremur árum síðar voru þeir komnir upp í 50. 1995 voru þeir orðnir 110 og þegar fyrstu vellirnir voru settir upp hér á landi voru þeir orðnir yfir 200. Árið 2011 voru um 500 vellir utan Bandaríkjanna og um síðustu áramót voru 1113 vellir utan Bandaríkjanna.

Fjöldi valla utan Bandaríkjanna frá 1986-2015

Þrír nýjir Íslandsmeistarar voru krýndir á Íslandsmótinu sem fram fór fyrstu helgina í september. Í opnum flokki sigraði Þorsteinn Óli Valdimarsson, í kvennaflokki sigraði Kolbrún Mist Pálsdóttir og í barnaflokki sigraði Andri Fannar Torfason. Svo skemmtilega vill til að allir þessir aðilar voru að vinna Íslandsmeistaratitil í fyrsta sinn. Við óskum þeim öllum til hamingju.

Dagana 2.-4. september nk. verður Íslandsmótið í frisbígolfi haldið í öllum flokkum. Mótið hefst á föstudaginn með Íslandsmótinu í Texas Scramble en það hefst kl. 17.30 á Klambratúnvelli. Keppt er í tveggja manna liðum og betra kastið hjá liðinu gildir.

Á laugardaginn hefst síðan keppni í A- og B- flokki á vellinum í Gufunesi. Mæting er kl. 9 en spilaðir verða 3 hringir auk úrslita.
Keppni í kvennaflokki verður á sunndaginn kl. 15 á vellinum í Fossvogi en spilaðir verða tveir hringir af hvítum teigum. Keppni í barnaflokki hefst kl. 15 í Fossvogi, spilaðir verða tveir hringir af rauðum teigum.

Nánari upplýsingar um mótið má nálgast hér. islandsmot2016

Skráning er á netfangið folf@folf.is

Margir eru að kynnast frisbígolfi í fyrsta sinn þessa dagana en gaman er að upplýsa að folfið á sér nokkuð langa sögu. Ekki er auðvelt að tímasetja nákvæmlega hvenær folfið varð til en flestir rekja það annarvegar til 1965 þegar bandaríkjamaður byrjaði að spila með frisbídiskum á golfvelli og hinsvegar þegar fyrsta einkaleyfið á folfkörfu var fengið 1975 sem er grunnurinn af þeim körfum sem eru notaðar í dag. Í fyrstu var þetta kallað “frisbee-golf” en Wham-O fyrirtækið sem átti vöruheitið “frisbee” fór fram á einkaleyfi á því nafni. Því var búið til nýtt nafn “disc-golf” sem er notað víðast hvar í dag.

Frisbígolfið barst hingað til lands í kringum 1998 og voru þá t.d. spilaðir vellir þar sem ruslatunnur voru notaðar sem skotmark en fyrsti “alvöru” völlurinn var settur upp á túni á Hömrum á Akureyri sumarið 2001 og voru notaðir staurar sem kastað var í. Sá völlur var nálægt því svæði þar sem braut 4 er á Hömrum í dag. Í framhaldi af því var settur upp völlur á Úlfljótsvatni með körfum úr síldartunnum og sumarið 2002 kom 9 brauta völlur í Gufunesi með körfum sem smíðaðar voru hér heima.

Frisbígolf hefur náð ótrúlega miklum vinsældum um allan heim síðustu ár og þó að íþróttin hafi byrjað í Bandaríkjunum þá eru nú tugir milljónir spilara í yfir 53 löndum og meira en 5.500 vellir sem hægt er að spila á. Hér á landi eru vellirnir orðnir 30 og fer fjölgandi. Þess má geta að töluverður fjöldi atvinnumanna keppir í frisbígolfi en mót eru haldin um allan heim með nokkuð góðum verðlaunum. Búið er að viðurkenna íþróttina fyrir Ólympíuleikana en ekki er vitað hvenær hún verður formleg keppnisgrein þar, það gæti tekið nokkur ár.

Árið 2005 var stofnað formlega Íslenska frisbígolfsambandið – ÍFS sem hefur það m.a. sem markmið að kynna sportið hér heima, fjölga völlum og spilurum. Á þessu ári eru haldnar yfir 60 keppnir sem eru öllum opnar, Íslandsmót er haldið fyrstu helgi í september.

Nú eru fjórir aðilar sem flytja inn og selja folfdiska á Íslandi. Þessir aðilar eru:

• Frisbígolfbúðin, Tjarnarbraut 21, sími 847 1165 – www.frisbigolf.is
• Fuzz frisbígolf. Sími 666 6660 – www.fuzz.is
• Musteri agans. Hverfisgötu 43, sími 666 6613 – www.musteriagans.is
• Discraft frísbígolfbúðin. Hlíðarsmára 1, Kóp., sími 546 0150. www.discraft.is

Það hefur því aldrei verið auðveldara að kaupa frisbígolfdiska og annan búnað í þessu frábæra sporti. Ert þú búinn að finna þinn uppáhaldsdisk?

Aldrei hafa jafn margir spilað frisbígolf á Íslandi en þetta sumar. Greinilegt er að vinsældirnar aukast dag frá degi og nú er svo komið að vinsælustu vellirnir eru troðfullir af áhugasömum kösturum og sérstaklega gaman að sjá hvað stemningin er afslöppuð hjá spilurum þó biðin sé töluverð. Fjölgun valla og auðvelt aðgengi er greinilega að virka vel enda 30 vellir komnir um allt land. Mörg sveitarfélög eru með í undirbúningi að setja upp velli næsta sumar enda íbúar farnir að óska eftir velli í sinni heimabyggð.
Einnig er greinilegt að fólk á öllum aldri er farið að spila og gaman að sjá að stelpurnar eru farnar að uppgvöta þessa frábæru íþrótt.

Á síðustu dögum hafa þrír nýjir frisbígolfvellir verið teknir í notkun hér á landi og er nú heildarfjöldi valla kominn í 30. Þessir nýju vellir eru á Neskaupsstað, í Vestmannaeyjum og í Reykjanesbæ en beðið hefur verið eftir þessum völlum með mikilli eftirvæntingu. Það er skemmtilegt að sjá hversu margir eru áhugasamir um folfið og við sjáum daglega nýja spilara sem eru að prófa. Allt sem þarf er bara einn frisbígolfdiskur og þá er hægt að byrja. Auðvitað er alltaf skemmtilegra að byrja með “sett” af diskum þ.e. pútter, midrange og dræver en þessi sett kosta frá 5.000 krónum þannig að byrjunarkostnaður er mjög lítill.

Við finnum líka fyrir auknum áhuga sveitarfélaga á að setja upp frisbígolfvöll í þeirra heimabæ en við fáum mikið af fyrirspurnum til okkar. Auðvitað er þetta frábær og ódýr viðbót við þá afþreyingu sem í boði er fyrir íbúana og stuðlar að aukinni lýðheilsu þeirra. Það er því líklegt að völlum eigi eftir að fjölga enn meira á komandi mánuðum og árum.

Eftir langan og snjóþungan vetur eru vellirnir óðum að taka við sér og folfarar streyma út til þess að spila. Þó sífellt fleiri spili allt árið þá er alltaf stærsti hópurinn sem spilar yfir sumarmánuðina enda skemmtilegasti tíminn fyrir frisbígolf. Gaman er að sjá þennan mikla fjölda sem hefur uppgvötað folfið og margir þeirra gríðarlega efnilegir. Við hvetjum sem flesta til að prófa að taka þátt í einhverjum af þeim 60 mótum sem við höldum á þessu ári. Hér er hægt að sjá mótaskrána.

Nú í sumar verður hægt að velja á milli 30 valla sem eru mjög fjölbreyttir og því auðvelt að finna völl við hæfi. Alltaf bætast ný sveitarfélög í hóp þeirra sem bjóða þessa frábæru íþrótt fyrir sína íbúa og hvetjum við áhugasama til þess að hafa samband við bæjarstjórn og senda þeim í framhaldi beiðni um völl með tillögu um staðsetningu. Hafið endilega samband á folf@folf.is ef þið viljið aðstoð frá okkur.

Gleðilegt frisbígolfsumar.