Á hverju ári fjölgar frisbígolfvöllum hér á landi en nú er einmitt rétti tíminn til að taka ákvörðun um að setja upp völl næsta sumar. Einfalt er að senda inn erindi til bæjarfélagsins þar sem óskað er eftir að settur verði upp völlur en ástæðurnar eru fjölmargar. Fyrir utan tilbreytingu og fjölbreytni í afþreyingu þá er frisbígolfið sérlega hentugt fyrir alla aldurshópa og auðvelt fyrir hvern sem er að ná tökum á því.

• Ódýrt og einfalt er að setja upp heilan völl. Engar landslagsbreytingar.
• Kostar ekkert að spila á völlunum.
• Búnaður er mjög ódýr, í byrjun nægir einn 2.000 króna frisbídiskur.
• Hentar allt frá börnum til ömmu og afa.
• Hægt að spila í nánast öllum veðrum, allt árið um kring.
• Holl og góð hreyfing. Upplagt lýðheilsuverkefni.
• Hægt að stunda einn eða fara með vinahópnum.
• Færir nýtt líf á svæði þar sem er t.d. skógrækt, útivistarsvæði, almenningsgarðar ofl.
• Viðhald á völlunum er mjög lítið.

Það er því engin spurning að frisbígolfvöllur er frábær viðbót við þá afþreyingu sem fyrir er. Hafið endilega samband við okkur á folf@folf.is til að fá ráðleggingar eða svör við spurningum. Á kortinu hér við hliðina er hægt að sjá alla velli hér á landi en þeir eru orðnir 45 talsins.

Núna yfir vetrarmánuðina er óhætt af fara að hlakka til vorsins en á hverri viku lengist dagurinn um c.a. 40 mínútur. Þó að snjór sé yfir öllu þá má ekki gleyma því að allir folfvellir landsins eru opnir og það eina sem þarf til þess að spila frisbígolf í þessum aðstæðum eru nokkrir litsterkir diskar, hlýr fatnaður og góðir vinir. Margir eru einnig duglegir að æfa púttin innandyra yfir vetrartímann en hægt er að finna upplýsingar um inniæfingar á FB síðunni okkar “frisbígolf”.

Það er gaman að bera saman uppgang frisbígolfsins á Íslandi miðað við önnur lönd en Bandaríkin og Finnland hafa verið mest í umræðunni þegar kemur að fjölgun valla og grósku í sportinu. Þegar bornar eru saman tölurnar kemur hinsvegar í ljós að hvergi í heiminum eru jafnmargir vellir og á Íslandi miðað við hina frægu höfðatölu.

Ísland – 1 völlur á hverja 7.333 íbúa

Finnland – 1 völlur á hverja 9.565 íbúa

Bandaríkin – 1 völlur á hverja 60.684 íbúa

Einnig er áhugavert að bera saman þann gríðarlega vöxt í sportinu á heimsvísu og sérstaklega síðustu 5-7 árin. Árið 2000 voru 1.017 frisbígolfvellir á heimsvísu en árið 2017 eru þeir orðnir 6.976, með sama áframhaldi verða orðnir 20-30 þúsund vellir eftir nokkur ár.

Einn af kostum frisbígolfs er sá að hægt er að spila það allt árið, óháð veðri. Góður fatnaður og litsterkir diskar virka vel í snjónum og ekki er verra ef félagsskapurinn er skemmtilegur. Fátt er meira hressandi en góður göngutúr á frisbígolfvelli og veðuraðstæður koma jafnt niður á öllum spilurum.
Við hvetjum alla til þess að prófa vetrarfolf þessa mánuði sem framundan eru og halda sér þannig í góðu spilaformi allan veturinn, það er forskot sem getur skipt máli næsta vor.

Nú þegar sumarið er á enda er vert að minna á að haustið er frábær tími til að spila frisbígolf. Hauststillurnar eru góðar og þó að dagur sé styttri þá er upplagt að taka hring og halda sér þannig við. Margir vellir eru með góða teiga, gerfigras eða hellur, sem eru mjög hentugir í bleytunni.

Þetta sumar var auðvitað mjög gott fyrir sportið en aldrei hafa fleiri stundað sportið hér á landi enda komu 15 nýjir vellir í sumar og eru orðnir 45. Við hvetjum alla til að drífa sig út og spila.

Um síðustu helgi var haldið glæsilegt Íslandsmót í frisbígolfi en fyrsta Íslandsmótið var haldið árið 2002. Keppt var í 7 flokkum auk þess sem keppt var í Texas scramble á föstudeginum. Þátttaka var mjög góð og veður fjölbreytt.

Íslandsmeistari í opnum flokki A er Ástvaldur Einar Lindberg Jónsson
Íslandsmeistari í kvennaflokki A er Kolbrún Mist Pálsdóttir
Íslandsmeistari í A flokki barna er Heiðmar Örn Sigmarsson

Við óskum þeim öllum til hamingju.

Næstu helgi verður haldið Íslandsmótið i frisbígolfi en þetta er í 13. skiptið sem keppt er um Íslandsmeistaratitilinn. Með mikilli fjölgun valla og spilara hefur keppnin aukist mikið en óhætt er að segja að aldrei hafa fleiri átt möguleika að vinna titilinn en á þessu ári.

Núverandi Íslandsmeistari í opnum flokki er Þorsteinn Óli Valdimarsson og er hann alltaf líklegur til sigurs á þeim mótum sem hann keppir í. Hann fær þó sterka samkeppni frá þeim sem hann hefur keppt við undanfarin ár og eru þar Jón Símon Gíslason, Þorvaldur Þórarinsson og Ástvaldur Einar Jónsson líklegir í verðlaunasæti þetta árið en Jón Símon og Þorvaldur eru fyrrum Íslandsmeistarar. Unga kynslóðin kemur líka sterk inn en hann Blær Örn Ásgeirsson hefur átt frábært ár og er til alls líklegur auk þess sem Bjarni Þór Bjarnason hefur verið að stórbæta sig undanfarið en þessir strákar eru aðeins 14 og 15 ára gamlir. Auk þessara 6 sem nefndir eru hér að ofan er annar eins hópur sem auðveldlega getur blandað sér í toppbaráttuna á góðum degi.

Í kvennaflokknum hefur baráttan undanfarið aðallega staðið á milli núverandi Íslandsmeistara, Kolbrúnar Mist Pálsdóttur og Guðbjargar Ragnarsdóttur en hún er margfaldur Íslandsmeistari.

Þetta verður því spennandi mót og hörkubarátta um efstu sætin.

Stærsta mót ársins er að sjálfsögðu Íslandsmótið í frisbígolfi en það verður haldið fyrstu helgina í september. Við bjóðum í ár upp á 7 flokka þar sem tekið er tillit til styrkleika og áhuga keppenda sem er að sjálfsögðu misjafn. Við hvetjum alla folfara til að taka þátt í þessu skemmtilega móti, hvort sem þið eruð nýlega byrjuð eða búin að keppa í mörg ár. Nánari upplýsingar og dagskrá mótsins má finna hér á síðunni undir flokknum “keppnir”.
Sjáumst á Íslandsmótinu.

http://www.folf.is/keppnir/islandsmot-2017/

Mikil fjölgun hefur orðið á frisbígolfvöllum í sumar en alls bætast við 12 nýjir vellir við þá 30 sem fyrir eru. Flestir þessir vellir eru komnir í notkun en þó eru einhverjir sem enn eru í framkvæmdarferli. Nú eru komnir vellir í alla landshluta og því ætti að vera stutt í næsta völl fyrir flesta. Við hvetjum spilara og áhugafólk um frisbígólf að hafa samband við sitt bæjarfélag og hvetja til þess að settur verði upp völlur.

Nýju vellirnir í sumar eru; Kópavogsdalur, Selfoss, Hvolsvöllur, Hella, Stokkseyri, Eyrarbakki, Búðardalur, Reykholt, Hrafnagil, Drangsnes, Höfn í Hornafirði, Grafarholt auk þess sem þrjár körfur verða settar upp á Dalvík.

Þessa dagana er heimsmeistarinn í frisbígolfi, Ricky Wysocky, staddur hér á landi en Ricky vann einmitt heimsmeistartitilinn í annað skiptið um síðustu helgi. Hann er fæddur 1993 í Ohio í Bandaríkjnunum og hefur verið atvinnumaður í folfi síðan 2010.
Ricky verður á Fossvogsvellinum í dag, föstudaginn 30. júní, kl. 16.30 og sýna hæfni sína í pútti en hann þykir einn besti púttari heims. Allir velkomnir.