Frisbígolfið aldrei vinsælla

Síðustu tvær vikur hafa sannað það svo um getur að frisbígolfið er orðið gríðarlega vinsælt og hafa flestir frisbígolfvellir verið stútfullir af áhugasömum diskakösturum. Kostirnir eru auðvitað augljósir í þessum skemmtilega leik sem frisbígolfið er, ódýrt og einfalt og nýliðar eru fljótir að ná tökum á að kasta diskum. Auk þess fær fólk út úr þessu góða hreyfingu sem ekki hefur veitt af síðustu vikur.
Frá því að frisbígolfið var kynnt fyrst hér á landi þá hafa vinsældir þess vaxið með hverju ári og nú eru komnir yfir 60 sérhannaðir vellir um allt land og því auðvelt fyrir flesta að finna völl í nágrenninu. Nú í vor hafa aldrei fleiri spilað þessa frábæra íþrótt og má því með sanni segja að það hafi aldrei verið vinsælla en einmitt núna.

Frisbígolf á tímum veirufaraldurs

Þegar yfirvöld á Íslandi settu á samkomubann þann 16. mars sl. var ljóst að bann yrði sett á allt skipulagt íþróttastarf í landinu og að sjálfsögðu tókum við frisbígolfarar strax þátt í þessu með því að fella niður öll mót og samkomur sem fyrirhuguð voru.

Nú liggur fyrir að frá og með 4. maí nk. verður slakað á þessum reglum og munum við þá hefja mótahald að nýju um allt land en með breyttu fyrirkomulagi sem aðallega snýr að því að minnka smithættu vegna kórónavírusins. Þessar reglur falla vel að frisbígolfi og ekki er þörf á að breyta neinum reglum í íþróttinni sjálfri heldur snýr þetta meira að umgengni um sameiginlegan búnað og hvert annað.

Þær reglur yfirvalda sem taka í gildi þann 4. maí að öllu óbreyttu eru:

  • Ekki fleiri en fjórir einstaklingar æfa eða leika saman.
  • Snertingar eru óheimilar og halda skal tveimur metrum á milli einstaklinga.
  • Notkun á sameiginlegum búnaði skal haldið í lágmarki en annars skal sótthreinsa hann á milli notkunar.

Vinahópar sem spila sér til gamans þurfa að vera meðvitaðir um þær smithættur sem eru til staðar og gera það sem hægt er að gera til að minnka smithættu á milli fólks. Við höfum gefið út leiðbeiningar til að árétta þetta og þar er t.d. góð hugmynd að minnka sameiginlega snertingu við körfuna með því að gefa stutt pútt og reikna þau sem eitt kast. Við mælum með 3 metrum en hópurinn kemur sér saman um þessa vegalend.

Mótahald.

Mót í frisbígolfi hefjast eftir 4. maí og verður mótaskráin kynnt á næstu dögum. Verið er að vinna í leiðbeiningum um framkvæmd mótanna en einnig erum við að vinna í samstarfi við PDGA um nánari útfærslur og fá leyfi til að hluti móta verði PDGA viðurkennd. Meðfylgjandi er listi yfir helstu áherslur í mótahaldi sumarsins en þetta getur þó breyst eftir aðstæðum og þeirri reynslu sem við fáum.

  • Tveggja metra reglan í fullu gildi við allar aðstæður
  • Boðið verður upp á spritthreinsun fyrir og eftir keppni
  • Keppendur snerta ekki eða handleika búnað annarra
  • Hámark fjórir keppendur í hverju holli
  • Skor verður einungis fært rafrænt
  • Úðabrúsar með spritti verða við körfur til hreinsunar
  • Verðlaunaafhending verður óhefðbundin og snertilaus

Við horfum bjartsýnum augum til næstu vikna og mánaða og trúum því að þetta verði enn eitt frábært sumar til fribígolfiðkunar.

ÍFS – Íslenska frisbígolfsambandið.

Stöndum saman

Nú þegar Covid-19 veiran gengur yfir heimsbyggðina er fólk hvatt til þess að halda sig fjarri öðrum og minnka þannig smithættuna sem er eina leiðin til að losna við þennan vágest. Allri starfsemi og mótahaldi hefur verið hætt í frisbígolfinu á meðan við erum að ná tökum á ástandinu.

Við viljum ítreka við þá einstaklinga sem eru að spila frisbígolf um þessar mundir að fylgja þeim leiðbeiningum sem Almannavarnir hafa sent út og koma þannig í veg fyrir að smitast eða smita aðra.

2 metrar á milli spilara. Veiran smitast með svokölluðu dropasmiti og hósti eða hnerri getur auðveldlega borið hana á aðrar manneskjur. Hún getur einnig smitast í samtali á milli aðila en tveir metrar er talin vera örugg fjarlægð.

Ekki snerta aðra diska. Veiran getur lifað á plasti í töluverðan tíma og því mikilvægt að snerta ekki aðra diska en þína eigin.

Ekki snerta körfuna. Góð hugmund er að sleppa púttinu og t.d. að gefa öll pútt sem eru 3 metrar eða styttra.

Það styttist í að lífið fari aftur í hefðbundinn farveg og þá getum við spilað aftur eins og okkur lystir. Hlýðum Víði og hlustum á Þórólf.

Hreyfum okkur!

Nú eru óvenjulegir tímar. Fólk er hvatt til að hittast ekki að óþörfu og alls ekki í stórum hópum til að minnka líkur á að smit berist á milli manna. Það er hinsvegar mikilvægt að hreyfa sig og frisbígolf er góður kostur ef skynsemin er höfð að leiðarljósi þegar sportið er stundað. Við hvetjum fólk til að spila sem mest en með ábyrgum og eftirfarandi hætti:

  • Haldið a.m.k. tveggja metra fjarlægð á milli spilara.
  • Ekki snerta aðra, heilsast eða faðmast.
  • Notið hanska þegar körfur eru snertar.
  • Ekki taka upp diska annarra spilara.
  • Takið sprittið með.

Þau sem eru viðkvæm fyrir eða með undirliggjandi sjúkdóma þurfa að fara mjög varlega og spila einsömul. Öll sem tök hafa á eru hvött til að hreyfa sig reglulega, fara í göngutúra og þar er frisbígolfið upplögð leið til þess að viðhalda heilsunni.

Sportið í sumar.
Frisbígolf er mjög hentug íþrótt að spila næstu mánuði á meðan veiran gengur yfir þar sem auðvelt er að uppfylla allar varúðaráðstafanir Landlæknis. Þetta er einstaklingsíþrótt þar sem samskipti við aðra geta verið alveg snertilaus og ekki spillir fyrir að frítt er að spila á öllum völlum landsins. Sj´áumst á næsta velli.

Aðalfundur ÍFS 2020

Aðalfundur Íslenska frisbígolfsambandsins verður haldinn miðvikudaginn 29. apríl nk. kl. 20 í húsnæði FGR að Þorláksgeisla 51.
Hefðbundin aðalfundarstörf, mótaskrá sumarsins, kynning á helstu niðurstöðum skoðanakönnunar. Hægt verður að taka þátt í fundinum með fjarfundarbúnaði.

Frisbígolf allt árið

Eitt af því ánægjulega í þróun folfvalla hér á landi síðustu ár eru betri teigar þ.e. undirlagið þaðan sem upphafskastið er tekið. Í raun má segja að vellirnir breytist úr sumarvöllum þar sem teigarnir eru góðir og þurrir í 2-3 mánuði í heilsársvelli sem gefur notendum kost á að spila allt árið.

Kostirnir eru auðvitað margir.
Fyrir utan það hversu mikið betra er að fóta sig á góðum teigum sem yfirleitt eykur líkurnar á góðu kasti þá eru nokkrir kostir til viðbótar. Minni hætta er á að renna til eða misstíga sig auk þess að kastsvæðið verður snyrtilegra því með mikilli notkun þá er grasið fljótt að gefa eftir og drulla myndast.
Nú eru flestir vellir á höfuðborgarsvæðinu komnir með heilsársteiga og við mælum eindregið með því að hefðbundir teigar (náttúrulegir) séu uppfærðir upp í góða heilsársteiga á öllum völlum landsins. Sendið okkur póst ef ykkar vantar frekari upplýsingar á folf@folf.is

Braut ársins 2019

Íslenska frisbígolfsambandið og Frisbígolfbúðin stóðu nú í byrjun ársins fyrir kosningu um Braut ársins 2019 og kölluðum við eftir tilnefningum frá spilurum en alls fengu 39 brautir atkvæði í þessu forvali. Margar skemmtilegar brautir eru hér á landi en við ákváðum að kjósa um þær sem fengu flestu tilnefningarnar.
Fyrsta brautin sem hlýtur þennan titil hefur verið valið en það er braut nr. 11 á frisbígolfvellinum á Hömrum, Akureyri.
Við hvetjum auðvitað alla sem hafa tækifæri til að spila þessa frábæru braut.

Spilað að vetri til

Nú er vetur á Íslandi og snjór og klaki þekur stóran hluta landsins. Það stoppar þó ekki frisbígolfara að stunda sína íþrótt því mjög auðvelt er að spila folf yfir vetrarmánuðina.
Þegar spilað er í snjó er auðvitað gott ráð að skilja hvítu diskana eftir heima og fylgjast vel með því hvar diskarnir lenda. Gormar eða léttir mannbroddar eru upplagðir þegar klaki og ís er á völlunum en margir af nýrri völlum eru með góða heilsársteiga sem koma sér vel í vetraraðstæðum.
Einnig er hægt að spila í myrkri en þá er upplagt að líma lítil og þunn ljós neðan á diskinn sem auðveldar leit að honum.
Við hvetjum alla til að prófa að spila yfir veturinn og klæða sig eftir aðstæðum.

Nýr 18 brauta völlur á Akureyri

Þessa dagana var verið að klára uppsetningu á nýjum 18 brauta velli á Háskólasvæðinu á Akureyri. Vegna fyrirhugaðra framkvæmda við Glerárskóla þurfti sá völlur að færast og kom þá upp sú hugmynd að setja hann á svæðið fyrir aftan Háskólann á Akureyri og stækka hann um leið í 18 brautir.
Þetta er aðeins þriðji völlurinn á Íslandi sem er með 18 brautir (hinir eru í Gufunesi og að Hömrum) en það sem er óvenjulegt við þennan að allar brautir eru mjög stuttar þannig að þetta er ekki hefðbundinn keppnisvöllur. Við vonum að völlurinn verði mjög skemmtilegur, einskonar stærri og erfiðari útgáfa af Hamarskotstúni.
Eins og aðrir vellir er frítt að spila á honum og við hvetjum alla til að prófa.

Frisbíhaust

Nú er haustið gengið í garð eftir frábært sumar og auðvitað er hægt að spila frisbígolf áfram eins og ekkert sé. Nú eru bestu vellirnir þeir sem eru með góða teiga (heilsársteiga) með undirlagi sem þolir þessa notkun þegar mikil bleyta er og grasið er viðkvæmt.
Á höfuðborgarsvæðinu eru byrjaðar tvær mótaraðir sem opnar eru fyrir alla, annarsvegar Sunnudagsdeildin sem spiluð á hverjum sunnudegi kl. 13 á vellinum í Grafarholti (Þorláksgeisla 51) og Ljósasérían sem spiluð er á miðvikudögum kl. 20 á mismunandi völlum. Þá eru sett ljós á diskana og spilað í myrkri. Nánari upplýsingar um þessi tvö mót eru á www.fgr.is.
Að auki verða inniæfingar í vetur fyrir þá sem vilja en við erum með Egilshöllina kl. 20 á laugardögum og í Fellaskóla á þriðjudögum kl. 20. Allir velkomnir.