Hið árlega Áramót var haldið í dag í góðu veðri og mættu 11 vaskir keppendur til leiks. Mikill snjór er í Gufunesi sem reyndist mörgum erfitt yfirferðar og fór svo að 4 keppendur luku leik. Mjög skemmtilegt er að spila völlinn í svona miklum snjó enda voru mörg skot í skrautlegri kantinum. Þrátt fyrir þetta vann Þorri á frábæru skori eða 6 undir (48 skotum), Birgir varð í öðru sæti, Haukur í þriðja og Jón Símon í fjórða. Í ljós kom að bleikir diskar sjást best í svona aðstæðum.
Nú er snjórinn loksins kominn og frostið farið að bíta. Mjög skemmtilegt er að spila frisbígolf á veturna þó að diskarnir breyti aðeins um hegðun. Gott ráð er að skilja alla hvíta diska eftir heima en nota frekar skæra liti sem auðvelt er að finna.
Svo er auðvitað nauðsynlegt að vera vel klæddur með húfu og vettlinga. Góða skemmtun!
Nú eru margir á ferðalögum erlendis og þá er gott ráð að taka með sér 2-3 diska og leita uppi velli í nágrenni við dvalarstaði. Á eftirfarandi vefslóð er hægt að finna velli sem skráðir eru með leiðbeiningum um rötun. Gott er að vera búinn að prenta út kort af vellinum hér heima því ekki er víst að það sé fáanlegt á staðnum. Eins og hér heima þá er yfirleitt frítt að spila á öllum völlum.
Til gamans má geta að í Svíþjóð eru 128 vellir, Finnlandi 118, Þýskalandi 34, Noregi 30 og í Bretlandi 20 en í sumar var fyrsti völlurinn settur upp í London. Flestir eru auðvitað vellirnir í Bandaríkjunum eða 3600.