Á hverju ári fjölgar frisbígolfvöllum hér á landi og er fjölbreyttni vallanna því orðið mikið en allir ættu að geta fundið sinn uppáhaldsvöll. Ef þú vilt fá völl í þinni heimabyggð hafðu þá endilega samband við okkur til aðstoðar og ráðgjafar hvernig best sé að snúa sér í því. Einnig getum við aðstoðað við hönnun á völlum. Netfangið er: folf@folf.is
Fyrsti völlurinn var settur upp á Akureyri 2001 en þá voru staurar notaðir til að kasta í en fyrsti alvöru völlurinn reis á Úlfljótsvatni árið 2002 með heimagerðum körfum úr síldarplasttunnum en nú eru tæplega 60 alvöru folfvellir með sérhannaðar körfur hér á landi og eru þessir vellir öllum opnir, allt árið. Auk þess eru minni vellir víðar.
Þessir vellir eru í stafrófsröð:
—
Akranes – Garðalundur
Í fallegu umhverfi í Garðalundi er flottur 9 brauta völlur en þar eru fjölbreyttar brautir með miklum gróðri, vötnum og ólíkum hindrunum. Tveir teigar eru á öllum brautum, annar léttur fyrir börn og byrjendur en hinn fyrir vanari spilara. Sumarið 2018 var klárað að endurnýja elstu körfurnar á vellinum.
—
Akureyri – Eiðsvöllur – púttvöllur
Á Eiðsvelli er skemmtilegur púttvöllur með stuttum brautum en nóg er að taka með sér pútterinn þegar þessi völlur er spilaður.
—
Akureyri – Glerárskóli
Sumarið 2015 var settur upp nýr 9 körfu völlur við Glerárskóla. Völlurinn var notaður sem keppnisvöllur á Unglingalandsmóti UMFÍ sumarið 2015 og er með fjölbreyttar brautir sem gaman er að spila.
—
Akureyri – Hamarkotstún
Sumarið 2014 var settur upp 9 brauta völlur á Hamrakotstúni við Þórunnarstræti (gengt sundlauginni). Flestar eru brautirnar frekar stuttar en krefjandi en tveir teigar eru á hverri braut. Völlurinn er mjög skemmtilegur og umhverfið fallegt. Völlurinn er með vinsælli folfvöllum á landinu enda ófáir ásar sem þarna koma. Gott er spila með pútterum eða midrange diskum á vellinum.
—
Akureyri – Hamrar
Þessi skemmtilegi og fjölbreytti 18 brauta völlur liggur fyrir ofan tjaldsvæðið að Hömrum og nær inn í Kjarnaskóg en fyrsta brautin er reyndar inn á tjaldsvæðinu og þá er kastað yfir eina af tjörnunum sem þar eru. Völlurinn reynir töluvert á hæfni spilara en hægt er að velja um hvíta og rauða teiga. Sumarið 2018 var völlurinn stækkaður í 18 brautir og er eini völlurinn í´þeirri stærð fyrir utan Gufunesið í Reykjavík. Skorkort og kort fást í þjónustumiðstöðinni auk þess sem þar eru seldir diskar.
Hér getur þú sótt mynd og skorkort af vellinum. Hamrar skilti 2013
—
Apavatn – á tjaldsvæði Rafiðnaðarsambands Íslands
6 brauta völlur sem settur var upp sumarið 2014.
—
Árskógsströnd
9 brauta völlur var settur upp á Árskógsströnd sumarið 2017 með þremur körfum en spilaðar eru þrjár brautir á hverja braut.
—
Bifröst
Við Háskólann á Bifröst er lítill 6 brauta völlur í skemmtilegu umhverfi. Á vellinum eru fyrstu körfurnar sem smíðaðar voru hér á landi og settar fyrst upp í Gufunesi.
—
Bolungarvík
Haustið 2015 var opnaður 9 körfu völlur í Bernódusarlundi og er völlurinn með 2 teiga á hverri braut. Í lundinum er skemmtilegt umhverfi með fjölbreyttum gróðri og trjám. Hæðamunur gerir völlinn krefjandi en kastað er bæði upp og niður halla sem þarna er. Á sumrin getur verið töluverð lúpína en þá er gott að taka vel eftir ef diskurinn lendir í henni.
—
Búðardalur
Vorið 2017 var settur upp 9 brauta völlur á Búðardal á skemmtilegum stað í bænum. Upplagt að taka hring ef fólk er á leiðinni um svæðið. Fyrsta braut byrjar við tjaldsvæðið.
—
Drangsnes
Sumarið 2017 var settur upp 5 brauta völlur Drangsnesi. Völlurinn er staðsettur við tjaldsvæðið og er fyrsti folfvöllur á þessu hluta landsins.
Hér er hægt að nálgast kort af vellinum. Sækja kort
—
Egilsstaðir – Tjarnargarðurinn
Í þessu frábæra umhverfi er 6 brauta völlur sem opnaður var sumarið 2015.
—
Fáskrúðsfjörður
Vorið 2018 var settur upp skemmtilegur 9 brauta völlur á Fáskrúðsfirði.
Sækja kort.
—
Flateyri
Sumarið 2013 tóku nokkrir hressir strákar sig til og smíðuðu körfur úr allskyns afgöngum og settu upp völl á Flateyri. Hann er staðsettur á Strákavöllum og er mjög skemmtilegur.
Sækja kort af vellinum á Flateyri. Flateyri folfvöllur
Sækja skorkort fyrir Flateyri. Skorkort Flateyri
—-
Flúðir
Sumarið 2014 var settur upp 9 brauta völlur á skemmtilegu svæði á Flúðum í Hrunamannahreppi. Völlurinn byrjar við bílastæðið við félagsheimilið og liggur í hring með ánni sem þar liggur. Þessi völlur er nokkuð erfiður yfirferðar og auðvelt að týna diskum.
—
Garðabær – Vífilsstaðatún
Fyrsti völlurinn í Garðabær var settur upp sumarið 2018 en hann er staddur á túninu fyrir framan Vífilstaði en þar er frábært svæði fyrir frisbígolf. Völlurinn er með 10 brautir og býður upp á mikla fjölbreyttni enda strax orðinn mjög vinsæll hjá spilurum.
—
Grindavík
2018 voru settar upp fyrstu fjórar körfurnar á vellinum í Sjómannagarðinum á móti Mánagötu. Stefnt er að því að stækka hann í 9 brautir á næsta ári.
—
Hafnarfjörður – Víðistaðatún
Sumarið 2014 var settur upp 6 brauta völlur á þessum skemmtilega stað í Hafnarfirði. Á sumrin teygir tjaldsvæðið sig stundum inn á stóra túnið og þarf þá að sýna tillitsemi þegar spilað er á því svæði.
—
Hella
Sumarið 2017 var settur upp flottur 9 brauta völlur á Hellu. Hann stendur á bökkum Ytri-Rangár nyrst í þorpinu. Völlurinn er í fallegur og gróðursælu umhverfi.
—
Hrafnagil Eyjafirði
Vorið 2017 var settur upp skemmtilegur 9 brauta völlur við íþróttasvæðið á Hrafnagili. Völlurinn er bæði með stuttum og löngum brautum og er krefjandi fyrir alla spilara.
—
Hrísey
Sumarið 2014 var settur upp flottur 9 körfu völlur í Hrísey á frábærum stað í skógræktinni með upphafsteig við gamla skólann. Tveir teigar eru á hverri braut sem gerir völlinn hentugan fyrir byrjendur sem og lengra komna.
—
Húsavík
Á Húsavík er flottur 5 brauta völlur en er hann staðsettur rétt austan við bæinn.
—
Hvanneyri
Haustið 2017 var settur upp skemmtilegur 9 brauta völlur á Hvanneyri. Völlurinn er með einum teig á hverri braut og er fjölbreyttur og krefjandi. Fyrsti teigur er við kirkjuna.
—
Hvolsvöllur
Sumarið 2017 var settur upp flottur 9 brauta völlur á Hvolsvelli við íþróttasvæðið. Völlurinn er fjölbreyttur og skemmtilegur.
—
Höfn í Hornafirði
Sumarið 2017 var settur upp 9 brauta völlur við tjaldsvæðið á Höfn. Völlurinn liggur í suður af tjaldsvæðinu og nýtir bæði skóglendi og hæðamismun vel.
Sækja kort af velli. Hofn-skilti
—
Kópavogur – Dalvegur
Vorið 2017 var settur upp fyrsti völlurinn í Kópavogi en hann er í Kópavogsdalnum sem liggur við hlið Dalvegs. Þetta er skemmtilegur 10 brauta völlur með tveimur teigum á hverri braut en völlurinn er strax orðinn einn af vinsælli völlum landsins.
—
Kópavogur – Guðmundarlundur
Í byrjun júlí 2018 var settur upp 10 brauta frisbígolfvöllur í Guðmundarlundi í Kópavogi (rétt við Kórinn og hesthúsahverfið). Völlurinn er í sértaklega fallegu skóglendi og brautirnar mjög fjölbreyttar en völlurinn er sérstaklega hannaður með byrjendur, fjölskyldur og meðalspilara í huga. Völlurinn bíður líka upp á tæknilega erfiðar brautir fyrir lengra komna og ætti því að henta flestum.
—
Miðhúsaskógur (við Laugarvatn)
Á svæði VR í Miðhúsaskógi við Laugarvatn er skemmtilegur 5 brauta völlur. Fjölbreytt kjarrlendi er á þessu svæði sem gerir völlinn krefjandi og áhugaverðan.
Sækja kort af vellinum. Kort af velli.
Hér getur þú sótt skorkort af vellinum. Sækja skorkort.
—
Mosfellsbær – Ævintýragarðurinn
Vorið 2014 var opnaður völlur á þessum skemmtilega stað þar sem fyrirhugað er að byggja upp sannkallað ævintýrasvæði. Völlurinn býður upp á mishæðir, gróður og skemmtilega fjölbreyttni. Tveir teigar eru á vellinum, rauðir og hvítir.
—
Neskaupsstaður
Sumarið 2016 var settur 9 brauta völlur á skemmtilegt svæði við snjóflóðavarnargarðana.
—
Reykhólar
Sumarið 2017 var settur upp stuttur en krefjandi 9 brauta völlur á þessum flotta stað í Reykhólahreppi. Tveir teigar eru á hverri braut.
—
Reykjanesbær – Rómantískasvæðið
Sumarið 2016 var settur upp 8 brauta völlur á þessu skemmtilega svæði við Aðalgötu (á móts við Vatnsholt). Völlurinn er með stuttum brautum og liggur fram og til baka í fjölbreyttu landslagi.
—
Reykjavík – Fella- og Hólahverfi – Breiðholt
Þessi völlur er efst í Elliðaárdalnum en þrír teigar á hverri braut. Völlurinn er í náttúrulegu umhverfi og því er mikilvægt að fylgjast vel með diskunum til þess að týna þeim ekki sérstaklega nálægt lúpínunni. Á fyrstu og níundu braut er kastað nálægt vatni sem getur verið erfitt. Við ráðleggjum öllum byrjendum á að spila af rauðu teigunum.
—
Reykjavík – Fossvogsdalur
Sumarið 2014 var opnaður frábær völlur á þessum skemmtilega stað. Brautirnar liggja beggja vegna bæjarmarka Reykjavíkur og Kópavogs og er vallarstæðir einkar fallegt með tjörnum, háum trjám og fallegum grasflötum. Fyrsta braut er vestast í dalnum (Landsspítalamegin).
—
Reykjavík – Grafarholt
Í Leirdal í Grafarholti var settur upp völlur í september 2017. Þetta er flottur 9 brauta völlur sem liggur á skemmtilegu svæði í skóglendi sem þarna er. Á þessum velli er lengsta braut landsins, heilir 201 metrar, og á þessu svæði er einnig komið fyrsta æfingakastsvæðið hér á landi (driving range). Sumarið 2018 voru settir flottir gervigrasteigar á allar brautir sem gerir völlinn einn þann flottasta á landinu.
—
Reykjavík – Gufunes í Grafarvogi
Í Gufunesi er eini 18 brauta völlurinn og er hann mjög skemmtilegur, fjölbreyttur og krefjandi þar sem finna má nokkrar af lengstu brautum landsins. Á hverri braut eru þrjár gerðir af teigum; léttir, miðlungs og erfiðir. Stórt kort er við bílastæðið sem lýsir vel vellinum. Teigarnir á fyrstu holu eru rétt við bílastæðið. Völlurinn var tekinn í notkun sumarið 2002.
—
Reykjavík – Klambratún
Einn vinsælasti frisbígolfvöllur landsins er á Klambratúni í hjarta Reykjavíkur en völlurinn var hannaður og settur upp sumarið 2010. Á vellinum eru 9 fjölbreyttar brautir en umhverfið á Klambratúni er mjög hentugt fyrir frisbígolf með háum trjám og gróðri sem búa til skemmtilegar hindranir fyrir alla folfara. Völlurinn er mjög hentugur fyrir byrjendur í sportinu en einnig þá sem lengra eru komnir. Lengsta brautin er 98 metrar.
—
Reykjavík – Laugardalur
Skemmtilegur völlur á besta stað í Reykjavík. Tveir teigar eru á hverri braut, rauður og hvítur og eru hvítu teigarnir hellulagðir til þess að ná sem bestu upphafsskoti. Best er að leggja bílnum við KFUM heimilið Holtavegi því þar er fyrsta braut. Völlurinn liggur í átt að TBR húsinu. Hér er kort af vellinum.
—
Reykjavík – Seljadalur – Seljahverfi
Sumarið 2015 var tekinn í notkun völlurinn í Seljadal í Breiðholti en hann er stuttur 9 brauta og liggur upp og niður dalinn. Fyrsti teigur er við Seljakirkju (Barnaheimilið). Völlurinn er mjög hentugur þeim sem eru að byrja í sportinu og uppáhaldsvöllur margra.
—
Sauðárkrókur
Á Sauðárkróki er 9 brauta völlur sem staðsettur er nálægt íþróttasvæðinu. Völlurinn var settur upp fyrir Landsmót UMFÍ 2018.
—
Selfoss
Sumarið 2017 kom upp völlur á tjaldsvæðinu á Selfossi. Þetta er 9 brauta völlur sem liggur umhverfis tjaldsvæðið og nýtir vel þann gróður sem þarna er.
—
Seltjarnarnes – Valhúsahæð
Þarna er skemmtilegur 9 brauta völlur og er fyrsta karfan við kirkjuna.
—
Stokkseyri
9 brauta völlur sem settur var upp sumarið 2017. Völlurinn er staðsettur á fjölbreyttu svæði við tjaldsvæðið.
—
Úlfljótsvatn
Við Útilífsmiðstöð skáta á Úlfljótsvatni er skemmtilegur 10 holu völlur sem er mjög “skátalegur” þ.e. hann liggur um fjölbreytt landslag. Þetta er elsti völlur landsins og settur upp sumarið 2002 en fyrri hluti vallarins er inn á tjaldsvæðinu en seinni hluti liggur meðfram fallegum læk. Fyrsta holan er við aðalhliðið inn á tjaldsvæðið og síðasta holan endar þar rétt hjá. Hægt er að fá leigða diska í þjónustumiðstöðinni.
—
Vestmannaeyjar
Sumarið 2016 var tekinn í notkun 6 brauta völlur í Vestmannaeyjum en hann er rétt við íþróttahúsið og sundlaugina.
—
Auk þessara valla eru víða körfur s.s. við Hólavatn í Eyjafirði, í Vatnaskógi, Fossatúni, á Tálknafirði, Möðrudalsöræfum og víðar.